gar baDe mard ho to ghair ko yan ja dije

gar baḌe mard ho to ġhair ko yaañ jā diije

us ko kah dekhiye kuchh yā mujhe uThvā diije

kaun aisā hai jo chheḌe hai tumheñ raah ke biich

maiñ samajh lūñgā Tuk us ko mujhe batlā diije

dil o jaan o ḳhirad o diiñ pahle hī din de baiThe

aaj hairāñ huuñ ki aatā hai use kyā diije

kyā huā haal bhalā dekh to mujh be-dil kā

na kabhī dilbarī kiije na dilāsa diije

da.avā-e-rustamī karte to haiñ par ik dam meñ

chhīn luuñ teġh-o-sipar un kī jo farmā diije

gum huā hai abhī yaañ gauhar-e-dil ai ḳhūbāñ

haath lag jaave tumhāre to mujhe pā diije

bevafā dushman-e-mehr āfat-e-jāñ sañgīñ-dil

haif 'bedār' ki aise ko dil apnā diije

gar baDe mard ho to ghair ko yan ja dije

us ko kah dekhiye kuchh ya mujhe uThwa dije

kaun aisa hai jo chheDe hai tumhein rah ke bich

main samajh lunga Tuk us ko mujhe batla dije

dil o jaan o KHirad o din pahle hi din de baiThe

aaj hairan hun ki aata hai use kya dije

kya hua haal bhala dekh to mujh be-dil ka

na kabhi dilbari kije na dilasa dije

dawa-e-rustami karte to hain par ek dam mein

chhin lun tegh-o-sipar un ki jo farma dije

gum hua hai abhi yan gauhar-e-dil ai KHuban

hath lag jawe tumhaare to mujhe pa dije

bewafa dushman-e-mehr aafat-e-jaan sangin-dil

haif 'bedar' ki aise ko dil apna dije