گر دل کے تقاضوں پہ سنور جائے تو جانوں

گر دل کے تقاضوں پہ سنور جائے تو جانوں

تکمیل تصور جو نظر آئے تو جانوں

سنتا ہوں مسیحائی کے چرچے ترے اکثر

یہ درد نہاں حد سے گزر جائے تو جانوں

اس دشت نوردی کے سبب خاک ہوا ہوں

یہ خاک ترے در پہ بکھر جائے تو جانوں

یہ آئنہ نازاں ہے صداقت پہ جو اپنی

ہاں عکس دروں اس پہ ابھر جائے تو جانوں

سب محو مسافت ہیں جو اوقات خلا میں

یہ گردش ایام ٹھہر جائے تو جانوں

کیا خوب ہے انداز نسیم سحری آج

وہ کاکل پر پیچ سنور جائے تو جانوں

بد نام زمانہ ہو ظہیرؔ آج تو کیا غم

رسوائی کی ان تک بھی خبر جائے تو جانوں