gar dil ke taqazon pe sanwar jae to jaanun

gar dil ke taqāzoñ pe sañvar jaa.e to jānūñ

takmīl-e-tasavvur jo nazar aa.e to jānūñ

suntā huuñ masīhā.ī ke charche tire aksar

ye dard-e-nihāñ had se guzar jaa.e to jānūñ

is dasht-navardī ke sabab ḳhaak huā huuñ

ye ḳhaak tire dar pe bikhar jaa.e to jānūñ

ye aa.ina nāzāñ hai sadāqat pe jo apnī

haañ ‘aks-e-darūñ is pe ubhar jaa.e to jānūñ

sab mahv-e-masāfat haiñ jo auqāt ḳhalā meñ

ye gardish-e-ayyām Thahar jaa.e to jānūñ

kyā ḳhuub hai andāz-e-nasīm-e-saharī aaj

vo kākul-e-pur-pech sañvar jaa.e to jānūñ

badnām-e-zamāna ho 'zahīr' aaj to kyā ġham

rusvā.ī kī un tak bhī ḳhabar jaa.e to jānūñ

gar dil ke taqazon pe sanwar jae to jaanun

takmil-e-tasawwur jo nazar aae to jaanun

sunta hun masihai ke charche tere aksar

ye dard-e-nihan had se guzar jae to jaanun

is dasht-nawardi ke sabab KHak hua hun

ye KHak tere dar pe bikhar jae to jaanun

ye aaina nazan hai sadaqat pe jo apni

han ‘aks-e-darun is pe ubhar jae to jaanun

sab mahw-e-masafat hain jo auqat KHala mein

ye gardish-e-ayyam Thahar jae to jaanun

kya KHub hai andaz-e-nasim-e-sahari aaj

wo kakul-e-pur-pech sanwar jae to jaanun

badnam-e-zamana ho 'zahir' aaj to kya gham

ruswai ki un tak bhi KHabar jae to jaanun