gar koi kaT le sar bhi tere diwane ka

gar koī kaaT le sar bhī tire dīvāne kā

par ye saudā-e-mohabbat hai nahīñ jaane kā

mast rakh yaad meñ us chashm kī tā-roz-e-jazā

muñh na dikhlā mujhe yā-rab kisī mai-ḳhāne kā

mere dil ko bhī na hove havas-e-bosa agar

āshnā lab se tire lab na ho paimāne kā

husn aur ishq kā mazkūr na hove jab tak

mujh ko bhātā nahīñ sunñā kisī afsāne kā

kyuuñ na muztar huuñ use dekh ke dekho to sahī

sham.a ke sāmne kyā haal hai parvāne kā

haath uThtā nahīñ ai yaar jo suljhāne se

dil tirī zulf se uljhā hai magar shāne kā

go ki mar jaa.e tire ishq meñ 'joshish' lekin

shikva-e-jaur-o-jafā muñh pe nahīñ laane kā

gar koi kaT le sar bhi tere diwane ka

par ye sauda-e-mohabbat hai nahin jaane ka

mast rakh yaad mein us chashm ki ta-roz-e-jaza

munh na dikhla mujhe ya-rab kisi mai-KHane ka

mere dil ko bhi na howe hawas-e-bosa agar

aashna lab se tere lab na ho paimane ka

husn aur ishq ka mazkur na howe jab tak

mujh ko bhata nahin sunna kisi afsane ka

kyun na muztar hun use dekh ke dekho to sahi

shama ke samne kya haal hai parwane ka

hath uThta nahin ai yar jo suljhane se

dil teri zulf se uljha hai magar shane ka

go ki mar jae tere ishq mein 'joshish' lekin

shikwa-e-jaur-o-jafa munh pe nahin lane ka