gar mante ho usko KHuda mutmain raho

gar mānte ho us ko ḳhudā mutma.in raho

jo bhī milā hai jitnā milā mutma.in raho

jab lashkar-e-umīd ko ḳhauf-e-shikast thā

tab āsmāñ se aa.ī sadā mutma.in raho

aurat ne jab bhī baat kī apne huqūq kī

duniyā ne saath mil ke kahā mutma.in raho

sāgar hai sirf dariyā kī mauzūñ ke dam se hī

ab ye bharam bhī TuuT gayā mutma.in raho

tum peḌ se phaloñ kī tavaqqo.a hī mat rakho

gar mil rahī hai is se havā mutma.in raho

ham hijr meñ ye kahte rahe dil se baar baar

vo hai faqat zarā sā ḳhafā mutma.in raho

chāragarī kī jab bhī kī zaḳhmoñ ne iltijā

hañs kar faqīr ne ye kahā mutma.in raho

saare bayān-e-ishq meñ mere ḳhilāf haiñ

tum ko nahīñ milegī sazā mutma.in raho

gar mante ho us ko KHuda mutmain raho

jo bhi mila hai jitna mila mutmain raho

jab lashkar-e-umid ko KHauf-e-shikast tha

tab aasman se aai sada mutmain raho

aurat ne jab bhi baat ki apne huquq ki

duniya ne sath mil ke kaha mutmain raho

sagar hai sirf dariya ki mauzun ke dam se hi

ab ye bharam bhi TuT gaya mutmain raho

tum peD se phalon ki tawaqqoa hi mat rakho

gar mil rahi hai is se hawa mutmain raho

hum hijr mein ye kahte rahe dil se bar bar

wo hai faqat zara sa KHafa mutmain raho

chaaragari ki jab bhi ki zaKHmon ne iltija

hans kar faqir ne ye kaha mutmain raho

sare bayan-e-ishq mein mere KHilaf hain

tum ko nahin milegi saza mutmain raho