gar sharik-e-badi nahin hota

gar sharīk-e-badī nahīñ hotā

lahja ab multajī nahīñ hotā

dard vo dard hī nahīñ hotā

dard jo dā.imī nahīñ hotā

kaam jo bā-ḳhushī nahīñ hotā

qā.ede se kabhī nahīñ hotā

dil meñ ishq-e-nabī na ho jab tak

kāmil īmān bhī nahīñ hotā

sar-nigūñ honā diin kī ḳhātir

darja-e-buzdilī nahīñ hotā

zikr hotā hai jab bhī daulat kā

aadmī aadmī nahīñ hotā

qaum behis na gar huī hotī

ālam-e-be-kasī nahīñ hotā

vaar kartā hai jo qarīb aakar

dosto ajnabī nahīñ hotā

jis ko daulat aziiz ho vo ġhanī

ho na ho par saḳhī nahīñ hotā

maiñ ġhalat thā yā huuñ ye mumkin hai

faisla har sahī nahīñ hotā

marzī ke jo ḳhilāf ho rishta

bā.is-e-sarḳhushī nahīñ hotā

be-ġharaz jo nahīñ vo kuchh bhī ho

jazba-e-dostī nahīñ hotā

aap ko shaiḳh kaun samjhā.e

har musalmāñ valī nahīñ hotā

maal fitna hai 'aḳhtar' aur fitna

hāsil-e-zindagī nahīñ hotā

gar sharik-e-badi nahin hota

lahja ab multaji nahin hota

dard wo dard hi nahin hota

dard jo daimi nahin hota

kaam jo ba-KHushi nahin hota

qaede se kabhi nahin hota

dil mein ishq-e-nabi na ho jab tak

kaamil iman bhi nahin hota

sar-nigun hona din ki KHatir

darja-e-buzdili nahin hota

zikr hota hai jab bhi daulat ka

aadmi aadmi nahin hota

qaum behis na gar hui hoti

aalam-e-be-kasi nahin hota

war karta hai jo qarib aakar

dosto ajnabi nahin hota

jis ko daulat aziz ho wo ghani

ho na ho par saKHi nahin hota

main ghalat tha ya hun ye mumkin hai

faisla har sahi nahin hota

marzi ke jo KHilaf ho rishta

bais-e-sarKHushi nahin hota

be-gharaz jo nahin wo kuchh bhi ho

jazba-e-dosti nahin hota

aap ko shaiKH kaun samjhae

har musalman wali nahin hota

mal fitna hai 'aKHtar' aur fitna

hasil-e-zindagi nahin hota