گر تار نفس ٹوٹے تو سب ختم ترا شور

گر تار نفس ٹوٹے تو سب ختم ترا شور

اے پیکر خاکی یہ ترا زعم ترا زور

تو بام پہ ٹھہرا ہے تو اتنا بھی نہ کر ناز

پاتال میں آ بھٹکے گا کٹ جائے اگر ڈور

مٹی ہی بھرے گی تری خواہش کا پیالہ

انساں تری فطرت ہے ابھی اور ابھی اور

ہے خاک کی خوراک یہاں خاک کے پرزے

بس تیری یہ وقعت ہے کبھی اس پہ کیا غور

ہر چیز کی گردن میں قلادہ ہے فنا کا

بچتا ہی نہیں کوئی یہاں پر تو کسی طور

سب پیچھے ہی رہ جائیں گے اے خانہ بدوشاؔ

یہ مال مویشی ترے ڈنگر یہ ترے ڈھور