gar tar-e-nafas TuTe to sab KHatm tera shor

gar tār-e-nafas TuuTe to sab ḳhatm tirā shor

ai paikar-e-ḳhākī ye tirā zo'm tirā zor

tū baam pe Thahrā hai to itnā bhī na kar naaz

pātāl meñ aa bhaTkegā kaT jaa.e agar Dor

miTTī hī bharegī tirī ḳhvāhish kā piyāla

insāñ tirī fitrat hai abhī aur abhī aur

hai ḳhaak kī ḳhūrāk yahāñ ḳhaak ke purze

bas terī ye vaq'at hai kabhī is pe kiyā ġhaur

har chiiz kī gardan meñ qilāda hai fanā kā

bachtā hī nahīñ koī yahāñ par to kisī taur

sab pīchhe hī rah jā.eñge ai 'ḳhāna-ba-doshā'

ye maal maveshī tire Dangar ye tire Dhor

gar tar-e-nafas TuTe to sab KHatm tera shor

ai paikar-e-KHaki ye tera zo'm tera zor

tu baam pe Thahra hai to itna bhi na kar naz

patal mein aa bhaTkega kaT jae agar Dor

miTTi hi bharegi teri KHwahish ka piyala

insan teri fitrat hai abhi aur abhi aur

hai KHak ki KHurak yahan KHak ke purze

bas teri ye waq'at hai kabhi is pe kiya ghaur

har chiz ki gardan mein qilada hai fana ka

bachta hi nahin koi yahan par to kisi taur

sab pichhe hi rah jaenge ai 'KHana-ba-dosha'

ye mal maweshi tere Dangar ye tere Dhor