gar yaad mein saqi ki saghar nazar aa jae

gar yaad meñ saaqī kī sāġhar nazar aa jaa.e

paimāna-e-dil chhalke muñh ko jigar aa jaa.e

aks-e-ruḳh saaqī ko gar dekh luuñ sāġhar meñ

kuchh dil ke bahalne kī sūrat nazar aa jaa.e

tayyār raho har-dam marne pe kamar bāñdhe

dar-pesh-e-ḳhudā jaane kab ye safar aa jaa.e

haañ sair tū kar ġhāfil us gor-e-ġharībāñ kī

anjām tujhe apnā shāyad nazar aa jaa.e

phir jaa.eñ hamesha ko duniyā se mirī āñkheñ

marte dam agar jalva terā nazar aa jaa.e

shor-e-nafas-e-bulbul se hosh uḌeñ sab ke

gar zamzama-sanjī par ye musht-e-par aa jaa.e

bīmār-e-mohabbat kī ab hai ye duā har-dam

phir shaam na ho jis kī aisī sahar aa jaa.e

behtar hai ḳham-o-sāġhar āñkhoñ se raheñ ojhal

aisā na ho shīshe par dil TuuT kar aa jaa.e

'yās' aap kī be-jurmī aaḌe nahīñ aa saktī

gar baat par apnī vo bedād-gar aa jaa.e

gar yaad mein saqi ki saghar nazar aa jae

paimana-e-dil chhalke munh ko jigar aa jae

aks-e-ruKH saqi ko gar dekh lun saghar mein

kuchh dil ke bahalne ki surat nazar aa jae

tayyar raho har-dam marne pe kamar bandhe

dar-pesh-e-KHuda jaane kab ye safar aa jae

han sair tu kar ghafil us gor-e-ghariban ki

anjam tujhe apna shayad nazar aa jae

phir jaen hamesha ko duniya se meri aankhen

marte dam agar jalwa tera nazar aa jae

shor-e-nafas-e-bulbul se hosh uDen sab ke

gar zamzama-sanji par ye musht-e-par aa jae

bimar-e-mohabbat ki ab hai ye dua har-dam

phir sham na ho jis ki aisi sahar aa jae

behtar hai KHam-o-saghar aankhon se rahen ojhal

aisa na ho shishe par dil TuT kar aa jae

'yas' aap ki be-jurmi aaDe nahin aa sakti

gar baat par apni wo bedad-gar aa jae