garche mere KHulus se wo be-KHabar na tha

garche mire ḳhulūs se vo be-ḳhabar na thā

phir bhī mirī vafāoñ kā us par asar na thā

maiñ us fareb-e-husn se ḳhud bā-ḳhabar na thā

vo thā to mere saath ba-zāhir magar na thā

apnā use banā na sakā maiñ tamām umr

mujh meñ bahut hunar the magar ye hunar na thā

lab the ḳhamosh ḳhauf se iz.hār-e-ishq ke

par āñsuoñ ko mere kisī kā bhī Dar na thā

saare jahāñ kī ḳhaak ko ham chhānne ke ba.ad

lauTe to dekhā apnā ghar ab apnā ghar na thā

bīmār-e-ġham ke vāste kyā maut ke sivā

koī ilaaj dahr meñ ai chāra-gar na thā

kyā mai-kade kā nazm bhī tabdīl ho gayā

saaqī jo daur-e-jām idhar thā udhar na thā

hotī bhī fat.h kaise mirī jab the saath saath

vo log jin ke shāne pe ḳhud apnā sar na thā

kyuuñ us ne kī na zahmat-e-chāra-garī qubūl

kyā us ke paas chāra-e-zaḳhm-e-jigar na thā

coffē thā mujh ko rāh-e-vafā meñ ḳhayāl-e-yār

'tābish' balā se koī mirā ham-safar na thā

garche mere KHulus se wo be-KHabar na tha

phir bhi meri wafaon ka us par asar na tha

main us fareb-e-husn se KHud ba-KHabar na tha

wo tha to mere sath ba-zahir magar na tha

apna use bana na saka main tamam umr

mujh mein bahut hunar the magar ye hunar na tha

lab the KHamosh KHauf se izhaar-e-ishq ke

par aansuon ko mere kisi ka bhi Dar na tha

sare jahan ki KHak ko hum chhanne ke baad

lauTe to dekha apna ghar ab apna ghar na tha

bimar-e-gham ke waste kya maut ke siwa

koi ilaj dahr mein ai chaara-gar na tha

kya mai-kade ka nazm bhi tabdil ho gaya

saqi jo daur-e-jam idhar tha udhar na tha

hoti bhi fath kaise meri jab the sath sath

wo log jin ke shane pe KHud apna sar na tha

kyun us ne ki na zahmat-e-chaara-gari qubul

kya us ke pas chaara-e-zaKHm-e-jigar na tha

coffee tha mujh ko rah-e-wafa mein KHayal-e-yar

'tabish' bala se koi mera ham-safar na tha