garche zahir mein hain ahwal munawwar sare

garche zāhir meñ haiñ ahvāl munavvar saare

raqs karte haiñ añdhere mire andar saare

mauja-e-dard banā degā unheñ misl-e-sabā

vo jo phirte haiñ yahāñ sūrat-e-sarsar saare

dāġh-e-dil mere farozāñ haiñ zamīñ par aise

chhupte phirte haiñ falak par mah-o-aḳhtar saare

mire dariyā-e-suḳhan se hai 'ilāqa kaisā

vo to pāyāb nadī ke haiñ shanāvar saare

tishnagī zaaġh ne apnī to bujhā lī pal meñ

haif gāgar meñ paḌe rah ga.e kankar saare

kaun bantā hai safīna yahāñ kis kī ḳhātir

yuuñ to maujūd haiñ dariyā meñ shanāvar saare

rāh-rau aur bhī duniyā meñ haiñ 'arshad' lekin

merī hī raah meñ paḌte haiñ samundar saare

garche zahir mein hain ahwal munawwar sare

raqs karte hain andhere mere andar sare

mauja-e-dard bana dega unhen misl-e-saba

wo jo phirte hain yahan surat-e-sarsar sare

dagh-e-dil mere farozan hain zamin par aise

chhupte phirte hain falak par mah-o-aKHtar sare

mere dariya-e-suKHan se hai 'ilaqa kaisa

wo to payab nadi ke hain shanawar sare

tishnagi zagh ne apni to bujha li pal mein

haif gagar mein paDe rah gae kankar sare

kaun banta hai safina yahan kis ki KHatir

yun to maujud hain dariya mein shanawar sare

rah-rau aur bhi duniya mein hain 'arshad' lekin

meri hi rah mein paDte hain samundar sare