gard-alud darida chehra yun hai mah o sal ke baad

gard-ālūd darīda chehra yuuñ hai maah o saal ke ba.ad

jaise falak bārish se pahle jaise zamīñ bhauñchāl ke ba.ad

murda logoñ kī bastī meñ suntā huuñ āvāzeñ sī

jaise maqtal kā sannāTā bole aam qitāl ke ba.ad

hijr to pahle bhī aayā thā lekin ab vahshat hai aur

chaltī havā se laḌte haiñ ham ek parī-timsāl ke ba.ad

bhar jā.eñgī jis dam shāḳheñ sabz mahakte pattoñ se

jogī aate jaate mausam lauTeñge phir saal ke ba.ad

raat badan yuuñ lau dete the jaise sandal jaltā ho

lekin dil-e-dīvāna chāhe aur bhī kuchh ho visāl ke ba.ad

gar socheñ to hijr-zadoñ ne yuuñ bhī paa.ī umr baḌī

uTThe dil meñ dard se pahle baiThe gard malāl ke ba.ad

kaun se dukh ko palle bāñdheñ kis ġham ko tahrīr kareñ

yaañ to dard sivā hotā hai aur bhī arz-e-hāl ke ba.ad

gard-alud darida chehra yun hai mah o sal ke baad

jaise falak barish se pahle jaise zamin bhaunchaal ke baad

murda logon ki basti mein sunta hun aawazen si

jaise maqtal ka sannaTa bole aam qital ke baad

hijr to pahle bhi aaya tha lekin ab wahshat hai aur

chalti hawa se laDte hain hum ek pari-timsal ke baad

bhar jaengi jis dam shaKHen sabz mahakte patton se

jogi aate jate mausam lauTenge phir sal ke baad

raat badan yun lau dete the jaise sandal jalta ho

lekin dil-e-diwana chahe aur bhi kuchh ho visal ke baad

gar sochen to hijr-zadon ne yun bhi pai umr baDi

uTThe dil mein dard se pahle baiThe gard malal ke baad

kaun se dukh ko palle bandhen kis gham ko tahrir karen

yan to dard siwa hota hai aur bhi arz-e-haal ke baad