gard-e-guman hawa-e-yaqin baiThne lagi

gard-e-gumāñ havā-e-yaqīñ baiThne lagī

baiThe na āsmāñ ki zamīñ baiThne lagī

sar yuuñ uThā rahī hai tamannā-e-kū-e-yār

phir ārzu-e-ḳhuld-e-barīñ baiThne lagī

ham be-makāñ hue ki hamāre makān meñ

ab be-gharī hī ban ke makīñ baiThne lagī

aisā nahīñ ki shak hai mujhe us ke aane meñ

lekin ye kyā ki nabz-e-yaqīñ baiThne lagī

tūfān tham gayā to rukī zarre kī uḌaan

thī jis jagah kī ḳhaak vahīñ baiThne lagī

hālāñki vo khaḌā hai isī par jamā ke paañv

phir kyā kiyā falak ne zamīñ baiThne lagī

ai 'badr' tere she'r kā lahja hai dil-nashīñ

har baat mere dil meñ kahīñ baiThne lagī

gard-e-guman hawa-e-yaqin baiThne lagi

baiThe na aasman ki zamin baiThne lagi

sar yun uTha rahi hai tamanna-e-ku-e-yar

phir aarzu-e-KHuld-e-barin baiThne lagi

hum be-makan hue ki hamare makan mein

ab be-ghari hi ban ke makin baiThne lagi

aisa nahin ki shak hai mujhe us ke aane mein

lekin ye kya ki nabz-e-yaqin baiThne lagi

tufan tham gaya to ruki zarre ki uDan

thi jis jagah ki KHak wahin baiThne lagi

haalanki wo khaDa hai isi par jama ke panw

phir kya kiya falak ne zamin baiThne lagi

ai 'badr' tere she'r ka lahja hai dil-nashin

har baat mere dil mein kahin baiThne lagi