گرد رہ بن کر فقط اک ہم سفر کے ہو گئے

گرد رہ بن کر فقط اک ہم سفر کے ہو گئے

راہیں تھیں لاکھوں مگر اک رہگزر کے ہو گئے

روئیں رونا کس لیے ہم اپنی تنہائی کا اب

اب پشیماں کیا ہوں جب دھوکے نظر کے ہو گئے

ہم نے سوچا تھا رہو گے یوں ہی تم میرے مگر

تم بھی اوروں کی طرح ہی مال و زر کے ہو گئے

گاؤں کی کچی سڑک پھر یاد نہ آئی تمہیں

شہر جا کے تم تو اے ہمدم شہر کے ہو گئے

آخرش تم نے بھی اپنے رنگ دکھلا ہی دئے

جس طرف دنیا ہوئی تم بھی ادھر کے ہو گئے

جس زمیں پر آئے تھے آدم سزا کے طور پر

اس زمیں پر کس قدر نخرے بشر کے ہو گئے

موج دریا سے بھلا اب کیا شکایت ہو مجھے

جبکہ یاں اپنے سفینے بھی بھنور کے ہو گئے

ایک وحدت ہاتھ سے چھوٹی تو دوجی ہاتھ آئی

اک خدا کو چھوڑ کر ہم اک بشر کے ہو گئے

اپنے محسن کے لیے رکھا نہیں دل میں نفاق

راہ کو آنکھوں سے چوما راہبر کے ہو گئے

چلچلاتی دھوپ میں اس زندگی کی اے سہیلؔ

جس سے بھی سایہ ملا ہم اس شجر کے ہو گئے