gard-e-rah ban kar faqat ek hum safar ke ho gae

gard-e-rah ban kar faqat ik ham safar ke ho ga.e

rāheñ thiiñ lākhoñ magar ik rah-guzar ke ho ga.e

ro.eñ ronā kis liye ham apnī tanhā.ī kā ab

ab pashemāñ kyā hoñ jab dhoke nazar ke ho ga.e

ham ne sochā thā rahoge yūñhī tum mere magar

tum bhī auroñ kī tarah hī māl-o-zar ke ho ga.e

gaañv kī kachchī saḌak phir yaad na aa.ī tumheñ

shahr jā ke tum to ai hamdam shahr ke ho ga.e

āḳhirash tum ne bhī apne rang dikhlā hī diye

jis taraf duniyā huī tum bhī udhar ke ho ga.e

jis zamīñ par aa.e the aadam sazā ke taur par

us zamīñ par kis qadar naḳhre bashar ke ho ga.e

mauj-e-dariyā se bhalā ab kyā shikāyat ho mujhe

jabki yaañ apne safīne bhī bhañvar ke ho ga.e

ek vahdat haath se chhūTī to duujī haath aa.ī

ik ḳhudā ko chhoḌ kar ham ik bashar ke ho ga.e

apne mohsin ke liye rakkhā nahīñ dil meñ nifāq

raah ko āñkhoñ se chūmā rāhbar ke ho ga.e

chilchilātī dhuup meñ is zindagī kī ai 'suhail'

jis se bhī saaya milā ham us shajar ke ho ga.e

gard-e-rah ban kar faqat ek hum safar ke ho gae

rahen thin lakhon magar ek rah-guzar ke ho gae

roen rona kis liye hum apni tanhai ka ab

ab pasheman kya hon jab dhoke nazar ke ho gae

hum ne socha tha rahoge yunhi tum mere magar

tum bhi auron ki tarah hi mal-o-zar ke ho gae

ganw ki kachchi saDak phir yaad na aai tumhein

shahr ja ke tum to ai hamdam shahr ke ho gae

aaKHirash tum ne bhi apne rang dikhla hi diye

jis taraf duniya hui tum bhi udhar ke ho gae

jis zamin par aae the aadam saza ke taur par

us zamin par kis qadar naKHre bashar ke ho gae

mauj-e-dariya se bhala ab kya shikayat ho mujhe

jabki yan apne safine bhi bhanwar ke ho gae

ek wahdat hath se chhuTi to duji hath aai

ek KHuda ko chhoD kar hum ek bashar ke ho gae

apne mohsin ke liye rakkha nahin dil mein nifaq

rah ko aankhon se chuma rahbar ke ho gae

chilchilati dhup mein is zindagi ki ai 'suhail'

jis se bhi saya mila hum us shajar ke ho gae