gard-e-rah-e-karwan rahe hain

gard-e-rah-e-kārvāñ rahe haiñ

ham manziloñ ke nishāñ rahe haiñ

kuchh ham bhī rahe haiñ apne dushman

kuchh aap bhī mehrbāñ rahe haiñ

kashtī hī na lag sakī kināre

dariyā to bahut ravāñ rahe haiñ

jab tum hameñ yaad aa ga.e ho

ai dost to ham kahāñ rahe haiñ

ma.alūm huā ki jān-e-jāñ tak

haa.il hamīñ darmiyāñ rahe haiñ

ab yuuñ na ye bastiyāñ ujāḌo

kuchh log kabhī yahāñ rahe haiñ

'shaukat' vahī husn-o-ishq ke giit

ham bhī to fasāna-ḳhvāñ rahe haiñ

gard-e-rah-e-karwan rahe hain

hum manzilon ke nishan rahe hain

kuchh hum bhi rahe hain apne dushman

kuchh aap bhi mehrban rahe hain

kashti hi na lag saki kinare

dariya to bahut rawan rahe hain

jab tum hamein yaad aa gae ho

ai dost to hum kahan rahe hain

malum hua ki jaan-e-jaan tak

hail hamin darmiyan rahe hain

ab yun na ye bastiyan ujaDo

kuchh log kabhi yahan rahe hain

'shaukat' wahi husn-o-ishq ke git

hum bhi to fasana-KHwan rahe hain