گردش حالات سے ہوں کیوں پریشاں تتلیاں

گردش حالات سے ہوں کیوں پریشاں تتلیاں

ہیں سرور و کیف و مستی میں یہ رقصاں تتلیاں

دیکھ کر رنگیں گلوں کی بے ثباتی نا سمجھ

کر رہی ہیں بے وفا بھنوروں سے پیماں تتلیاں

مستیوں میں محو ہیں مستوریوں میں کچھ مگر

ہیں کھلے بندوں غریق بحر عصیاں تتلیاں

مثل پروانہ کھینچی آتی ہیں اس کی دید کو

دیکھنے بیتاب ہیں ماہ درخشاں تتلیاں

چھیڑتی ہیں شوخیوں سے زرفشاں رخسار کو

چومتی ہیں یا سیاہ سنبلستاں تتلیاں

سیکھنا ہے شوخیاں ان کو کسی گل ناز سے

کر رہی ہیں یوں طواف کوئے جاناں تتلیاں

دیکھتا ہوں ان کو جب اٹکھیلیاں کرتے ہوئے

تو دلا دیتی ہیں مجھ کو یاد خوباں تتلیاں

فکر شعری کے لئے ارشدؔ چمن جاتا ہوں جب

ساتھ ہوتی ہیں مرے اکثر غزل خواں تتلیاں