gardish-e-jam bhi hai raqs bhi hai saz bhi hai

gardish-e-jām bhī hai raqs bhī hai saaz bhī hai

jis meñ naġhmoñ kā talātum hai vo āvāz bhī hai

itnā saada bhī use ai dil-e-pur-shauq na jaan

iltifāt ek nigāh-e-ġhalat-andāz bhī hai

mudda.ā un kā samajh meñ nahīñ aatā ai dil

be-sabab hai ye taġhāful ki koī raaz bhī hai

ġharq-e-kaifiyat-e-āhañg-e-tarab sun to sahī

zindagī dard meñ Duubī huī āvāz bhī hai

toḌ Dāleñge qafas aaj asīrān-e-qafas

azm-e-parvāz bhī hai quvvat-e-parvāz bhī hai

merī āñkhoñ se Dhalakte hue har ashk meñ aaj

aks-e-anjām bhī hai sūrat-e-āġhāz bhī hai

kaun jaane ye mire dil ke sivā ai 'muztar'

us kī ik jumbish-e-lab silsila-e-rāz bhī hai

gardish-e-jam bhi hai raqs bhi hai saz bhi hai

jis mein naghmon ka talatum hai wo aawaz bhi hai

itna sada bhi use ai dil-e-pur-shauq na jaan

iltifat ek nigah-e-ghalat-andaz bhi hai

muddaa un ka samajh mein nahin aata ai dil

be-sabab hai ye taghaful ki koi raaz bhi hai

gharq-e-kaifiyat-e-ahang-e-tarab sun to sahi

zindagi dard mein Dubi hui aawaz bhi hai

toD Dalenge qafas aaj asiran-e-qafas

azm-e-parwaz bhi hai quwwat-e-parwaz bhi hai

meri aankhon se Dhalakte hue har ashk mein aaj

aks-e-anjam bhi hai surat-e-aghaz bhi hai

kaun jaane ye mere dil ke siwa ai 'muztar'

us ki ek jumbish-e-lab silsila-e-raaz bhi hai