gardish-e-waqt ye kis moD pe lai mujhko

gardish-e-vaqt ye kis moḌ pe laa.ī mujh ko

apnī har saañs bhī lagtī hai parā.ī mujh ko

terī ḳhātir hī kiyā tark-e-ta'alluq jin se

dostī un se tirī aaj na bhaa.ī mujh ko

zaḳhm gahre haiñ magar uf bhī nahīñ kar saktā

achchhī lagtī nahīñ apnoñ kī burā.ī mujh ko

jab kiyā tark-e-ta'alluq kā irāda maiñ ne

terī āvāz meñ dī dil ne duhā.ī mujh ko

ruuh bechain hai itnī ki du'ā kartā huuñ

'umr kī qaid se mil jaa.e rihā.ī mujh ko

gardish-e-waqt ye kis moD pe lai mujh ko

apni har sans bhi lagti hai parai mujh ko

teri KHatir hi kiya tark-e-ta'alluq jin se

dosti un se teri aaj na bhai mujh ko

zaKHm gahre hain magar uf bhi nahin kar sakta

achchhi lagti nahin apnon ki burai mujh ko

jab kiya tark-e-ta'alluq ka irada main ne

teri aawaz mein di dil ne duhai mujh ko

ruh bechain hai itni ki du'a karta hun

'umr ki qaid se mil jae rihai mujh ko