گردش زمانہ سے کب نجات پاتے ہیں

گردش زمانہ سے کب نجات پاتے ہیں

بجلیوں کی زد پہ جو آشیاں بناتے ہیں

ظاہری نوازش کو دوستی نہیں کہتے

دل اگر نہیں ملتا ہاتھ کیوں ملاتے ہیں

دیکھنا ہے تم کب تک ہم سے بیر رکھوگے

ہر قدم پہ چاہت کے ہم دیے جلاتے ہیں

ہم نے جو زمانے کا کل سبق پڑھایا تھا

وہ اصول اب ہم کو آئنہ دکھاتے ہیں

زندگی حقیقت میں جو سمجھ کے جیتے ہیں

وہ خوشی میں روتے ہیں غم میں مسکراتے ہیں

ہم سے خوش نہیں ہوں گے مصلحت کے سوداگر

ان کے عیب ہم اکثر روشنی میں لاتے ہیں

رات کے اندھیرے میں ڈوب جاتے ہیں لیکن

صبح ہوتے ہی صابرؔ سائے سر اٹھاتے ہیں