gardish mein chashm-e-dost ka paimana aagya

gardish meñ chashm-e-dost kā paimāna aagyā

liije maqām-e-sajda-e-shukrāna aa gayā

maiñ aur sharāb-e-nāb magar is ko kyā karūñ

ġham mujh ko le ke jānib-e-mai-ḳhāna aa gayā

yārā-e-zabt rah na sakā rū-ba-rū-e-dost

āñkhoñ meñ khiñch ke dard kā afsāna aa gayā

sū-e-haram chale the baḌe ehtimām se

qismat kī baat raah meñ but-ḳhāna aa gayā

sajde machal rahe haiñ jabīn-e-niyāz meñ

shāyad qarīb-tar dar-e-jānāna aa gayā

dil hai agar to dil kā dhḌaknā hai lāzmī

raushan huī jo sham.a to parvāna aa gayā

yuuñ duur ho ga.ī mirī manzil ki raah meñ

mai-ḳhāna aa gayā kabhī but-ḳhāna aa gayā

ai 'shauq' un kī bazm se shohrat milī mujhe

har samt ek shor hai dīvāna aa gayā

gardish mein chashm-e-dost ka paimana aagya

lije maqam-e-sajda-e-shukrana aa gaya

main aur sharab-e-nab magar is ko kya karun

gham mujh ko le ke jaanib-e-mai-KHana aa gaya

yara-e-zabt rah na saka ru-ba-ru-e-dost

aankhon mein khinch ke dard ka afsana aa gaya

su-e-haram chale the baDe ehtimam se

qismat ki baat rah mein but-KHana aa gaya

sajde machal rahe hain jabin-e-niyaz mein

shayad qarib-tar dar-e-jaanana aa gaya

dil hai agar to dil ka dhDakna hai lazmi

raushan hui jo shama to parwana aa gaya

yun dur ho gai meri manzil ki rah mein

mai-KHana aa gaya kabhi but-KHana aa gaya

ai 'shauq' un ki bazm se shohrat mili mujhe

har samt ek shor hai diwana aa gaya