gardish mein hai zamin bhi kya aasman ke sath

gardish meñ hai zamīn bhī kyā āsmāñ ke saath

duniyā badal ga.ī nigah-e-mehrbāñ ke saath

dohrānā anjuman meñ samajh soch ke use

terī bhī dāstāñ hai mirī dāstāñ ke saath

ab maiñ huuñ aur kunj-e-qafas kī musībateñ

vo āshiyāñ kī baat ga.ī āshiyāñ ke saath

betābiyoñ se rabt thā bechainiyoñ se kaam

guzre haiñ aise din bhī us ārām-jāñ ke saath

roz-e-azal vahī to faqat mustahiq na thā

kuchh gardisheñ hameñ bhī milīñ āsmāñ ke saath

ġham ko tire bhulā na sakā do-jahāñ kā ġham

terā bhī ġham rahā hai ġham-e-do-jahāñ ke saath

ummīd hī nahīñ to guzar jā.egī yūñhī

ik mehrbāñ ke saath ki nā-mehrbāñ ke saath

ye soz-o-sāz-e-ishq ġham-e-jāvedāñ sahī

de umr-e-jāvedāñ bhī ġham-e-jāvedāñ ke saath

manzil kā kyā yaqīñ ho batā.e koī mujhe

jab rahguzār bhī hai ravāñ kārvāñ ke saath

gardish mein hai zamin bhi kya aasman ke sath

duniya badal gai nigah-e-mehrban ke sath

dohrana anjuman mein samajh soch ke use

teri bhi dastan hai meri dastan ke sath

ab main hun aur kunj-e-qafas ki musibaten

wo aashiyan ki baat gai aashiyan ke sath

betabiyon se rabt tha bechainiyon se kaam

guzre hain aise din bhi us aaram-jaan ke sath

roz-e-azal wahi to faqat mustahiq na tha

kuchh gardishen hamein bhi milin aasman ke sath

gham ko tere bhula na saka do-jahan ka gham

tera bhi gham raha hai gham-e-do-jahan ke sath

ummid hi nahin to guzar jaegi yunhi

ek mehrban ke sath ki na-mehrban ke sath

ye soz-o-saz-e-ishq gham-e-jawedan sahi

de umr-e-jawedan bhi gham-e-jawedan ke sath

manzil ka kya yaqin ho batae koi mujhe

jab rahguzar bhi hai rawan karwan ke sath