gardish mein liye phirte hain din-raat mujhe bhi

gardish meñ liye phirte haiñ din-rāt mujhe bhī

darpesh haiñ tum jaise hī hālāt mujhe bhī

tum bhuul ga.e ho to koī baat nahīñ hai

ab yaad nahīñ rahtī koī baat mujhe bhī

maiñ had se ziyāda use baḌhne nahīñ detā

roke hue rakhtā hai koī haath mujhe bhī

kis lahr meñ hai ai dil-e-pur-shauq-o-tamanna

le jā.egī ye mauj tire saath mujhe bhī

simTī huī rahtī hai mire ḳhvāb kī duniyā

bikhre nazar aate haiñ ḳhayālāt mujhe bhī

jis baat pe tum aaj bahut der hañse ho

ik roz rulā.egī yahī baat mujhe bhī

gardish mein liye phirte hain din-raat mujhe bhi

darpesh hain tum jaise hi haalat mujhe bhi

tum bhul gae ho to koi baat nahin hai

ab yaad nahin rahti koi baat mujhe bhi

main had se ziyaada use baDhne nahin deta

roke hue rakhta hai koi hath mujhe bhi

kis lahr mein hai ai dil-e-pur-shauq-o-tamanna

le jaegi ye mauj tere sath mujhe bhi

simTi hui rahti hai mere KHwab ki duniya

bikhre nazar aate hain KHayalat mujhe bhi

jis baat pe tum aaj bahut der hanse ho

ek roz rulaegi yahi baat mujhe bhi