گردش میں لئے پھرتے ہیں دن رات مجھے بھی

گردش میں لئے پھرتے ہیں دن رات مجھے بھی

درپیش ہیں تم جیسے ہی حالات مجھے بھی

تم بھول گئے ہو تو کوئی بات نہیں ہے

اب یاد نہیں رہتی کوئی بات مجھے بھی

میں حد سے زیادہ اسے بڑھنے نہیں دیتا

روکے ہوئے رکھتا ہے کوئی ہاتھ مجھے بھی

کس لہر میں ہے اے دل پر شوق و تمنا

لے جائے گی یہ موج ترے ساتھ مجھے بھی

سمٹی ہوئی رہتی ہے مرے خواب کی دنیا

بکھرے نظر آتے ہیں خیالات مجھے بھی

جس بات پہ تم آج بہت دیر ہنسے ہو

اک روز رلائے گی یہی بات مجھے بھی