gareban se tere kis ne nikala subh-e-KHandan ko

garebāñ se tire kis ne nikālā sub.h-e-ḳhandāñ ko

kiyā kis ne nihāñ dāman kī kaliyoñ se gulistāñ ko

uḌāyā chuTkiyoñ meñ mere zarre ne bayābāñ ko

mire qatre ne paanī kar diyā har mauj-e-tūfāñ ko

mirī kashtī bhañvar se khelne kā shauq rakhtī hai

ye kis ne kar diyā ḳhāmosh yārab mauj-e-tūfāñ ko

ye kyā naġhma thā chheḌā jo yakāyak qalb-e-muztar ne

ki merī nai ne raqsāñ kar diyā saare gulistāñ ko

maiñ huuñ vo qatra-e-shabnam ki chamkā tere partav se

lagī haiñ khīñchne kirneñ mirī mehr-e-daraḳhshāñ ko

mire zauq-e-fanā par zindagī hai ḳhizr kī qurbāñ

mire talḳhāna-e-ġham meñ Dubo do āb-e-haivāñ ko

kālīm-e-tūr-e-ma.anī huuñ yad-e-baizā hai merā dil

munavvar kar diyā jis ne mire chāk-e-garebāñ ko

gareban se tere kis ne nikala subh-e-KHandan ko

kiya kis ne nihan daman ki kaliyon se gulistan ko

uDaya chuTkiyon mein mere zarre ne bayaban ko

mere qatre ne pani kar diya har mauj-e-tufan ko

meri kashti bhanwar se khelne ka shauq rakhti hai

ye kis ne kar diya KHamosh yarab mauj-e-tufan ko

ye kya naghma tha chheDa jo yakayak qalb-e-muztar ne

ki meri nai ne raqsan kar diya sare gulistan ko

main hun wo qatra-e-shabnam ki chamka tere partaw se

lagi hain khinchne kirnen meri mehr-e-daraKHshan ko

mere zauq-e-fana par zindagi hai KHizr ki qurban

mere talKHana-e-gham mein Dubo do aab-e-haiwan ko

kalim-e-tur-e-mani hun yad-e-baiza hai mera dil

munawwar kar diya jis ne mere chaak-e-gareban ko