gharibon par nuzul-e-har-bala-e-na-gahan kyon ho

ġharīboñ par nuzūl-e-har-balā-e-nā-gahāñ kyoñ ho

ye one way mustaqil traffic bhalā ai āsmāñ kyoñ ho

agar aanā huā to ek filmī giit gā.egā

mirī mayyat pe vo hasb-e-rivāyat nauha-ḳhvāñ kyoñ ho

ye kyā andāz hai yārab samajhnā jis ko mushkil hai

zarīfāna-sitam marġhūb-e-ḳhū-e-dostāñ kyoñ ho

uThā ke sar se ūñchā pahle vo mujh ko paTaḳhte haiñ

bahut hī pyaar se phir pūchhte haiñ nīm-jāñ kyoñ ho

mohabbat ko to tum ne koī tug of war samjhā hai

na khīñcho gar tum apne ko kashākash darmiyāñ kyoñ ho

use jab naql karne kī ijāzat mil ga.ī tum se

adū ko Top karnā hai to merā imtihāñ kyoñ ho

bechārā sach jahāñ se dum dabā kar kab kā bhāgā hai

ta.āqub meñ abhī tak us ke phir saarā jahāñ kyoñ ho

dam-e-guftār jo biivī se aksar maat khātā hai

sar-e-mimbar vahī vaa.iz baḌā mojiz-bayāñ kyoñ ho

ġhurūr-e-husn kī pastī hai us kā raaz ai 'qāzī'

jise bachchoñ se nafrat ho vo das bachchoñ kī maañ kyoñ ho

gharibon par nuzul-e-har-bala-e-na-gahan kyon ho

ye one way mustaqil traffic bhala ai aasman kyon ho

agar aana hua to ek filmi git gaega

meri mayyat pe wo hasb-e-riwayat nauha-KHwan kyon ho

ye kya andaz hai yarab samajhna jis ko mushkil hai

zarifana-sitam marghub-e-KHu-e-dostan kyon ho

uTha ke sar se uncha pahle wo mujh ko paTaKHte hain

bahut hi pyar se phir puchhte hain nim-jaan kyon ho

mohabbat ko to tum ne koi tug of war samjha hai

na khincho gar tum apne ko kashakash darmiyan kyon ho

use jab naql karne ki ijazat mil gai tum se

adu ko Top karna hai to mera imtihan kyon ho

bechaara sach jahan se dum daba kar kab ka bhaga hai

taaqub mein abhi tak us ke phir sara jahan kyon ho

dam-e-guftar jo biwi se aksar mat khata hai

sar-e-mimbar wahi waiz baDa mojiz-bayan kyon ho

ghurur-e-husn ki pasti hai us ka raaz ai 'qazi'

jise bachchon se nafrat ho wo das bachchon ki man kyon ho