گرم ہے حسن کا بازار خدا خیر کرے

گرم ہے حسن کا بازار خدا خیر کرے

عام ہے شربت دیدار خدا خیر کرے

دیکھیے گرمئ گفتار خدا خیر کرے

ہو نہ جائے کہیں تکرار خدا خیر کرے

اب کہاں جائیں ترے چاہنے والے آخر

چرخ ہے درپئے آزار خدا خیر کرے

کل جو دم بھرتے تھے اے دوست محبت کا مری

ان کے ہونٹوں پہ ہے انکار خدا خیر کرے

مجھ سے برگشتہ مقدر ہی نظر آتا ہے

بگڑے بگڑے سے ہیں سرکار خدا خیر کرے

چل کے پوچھیں تو ذرا بازوئے قاتل کا حال

لے کے وہ نکلے ہیں تلوار خدا خیر کرے

ہائے اے جوش جنوں اب تو یہ حالت ہے مری

دیکھ کر کہتے ہیں اغیار خدا خیر کرے

چونک اٹھیں نہ کہیں قبر کے سونے والے

آپ کی شوخئ رفتار خدا خیر کرے

غیر کے جور و ستم کا کروں کس سے شکوہ

اپنوں کے بدلے جب اطوار خدا خیر کرے

خار ہی خار نظر آتے ہیں گلشن میں شفیعؔ

سونا سونا سا ہے گلزار خدا خیر کرے