garm hai husn ka bazar KHuda KHair kare

garm hai husn kā bāzār ḳhudā ḳhair kare

aam hai sharbat-e-dīdār ḳhudā ḳhair kare

dekhiye garmī-e-guftār ḳhudā ḳhair kare

ho na jaa.e kahīñ takrār ḳhudā ḳhair kare

ab kahāñ jaa.eñ tire chāhne vaale āḳhir

charḳh hai darpa.e-āzār ḳhudā ḳhair kare

kal jo dam bharte the ai dost mohabbat kā mirī

un ke hoñToñ pe hai inkār ḳhudā ḳhair kare

mujh se bargashta muqaddar hī nazar aatā hai

bigḌe bigḌe se haiñ sarkār ḳhudā ḳhair kare

chal ke pūchheñ to zarā bāzū-e-qātil kā haal

le ke vo nikle haiñ talvār ḳhudā ḳhair kare

haa.e ai josh-e-junūñ ab to ye hālat hai mirī

dekh kar kahte haiñ aġhyār ḳhudā ḳhair kare

chauñk uTTheñ na kahīñ qabr ke sone vaale

aap kī shoḳhī-e-raftār ḳhudā ḳhair kare

ġhair ke jaur-o-sitam kā karūñ kis se shikva

apnoñ ke badle jab atvār ḳhudā ḳhair kare

ḳhaar hī ḳhaar nazar aate haiñ gulshan meñ 'shafī.a'

suunā suunā sā hai gulzār ḳhudā ḳhair kare

garm hai husn ka bazar KHuda KHair kare

aam hai sharbat-e-didar KHuda KHair kare

dekhiye garmi-e-guftar KHuda KHair kare

ho na jae kahin takrar KHuda KHair kare

ab kahan jaen tere chahne wale aaKHir

charKH hai darpae-azar KHuda KHair kare

kal jo dam bharte the ai dost mohabbat ka meri

un ke honTon pe hai inkar KHuda KHair kare

mujh se bargashta muqaddar hi nazar aata hai

bigDe bigDe se hain sarkar KHuda KHair kare

chal ke puchhen to zara bazu-e-qatil ka haal

le ke wo nikle hain talwar KHuda KHair kare

hae ai josh-e-junun ab to ye haalat hai meri

dekh kar kahte hain aghyar KHuda KHair kare

chaunk uTThen na kahin qabr ke sone wale

aap ki shoKHi-e-raftar KHuda KHair kare

ghair ke jaur-o-sitam ka karun kis se shikwa

apnon ke badle jab atwar KHuda KHair kare

KHar hi KHar nazar aate hain gulshan mein 'shafia'

suna suna sa hai gulzar KHuda KHair kare