garm hai ishq ka bazar chalo dekhenge

garm hai ishq kā bāzār chalo dekheñge

kaun hai apnā ḳharīdār chalo dekheñge

kaun hai qaum kā sardār chalo dekheñge

vo bhī kis kā hai talabgār chalo dekheñge

sabz bāġhoñ kī ziyārat to bahut achchhī hai

kaun hamdard hai sarkār chalo dekheñge

ham ne kaliyoñ ko jahāñ ḳhuun diyā thā pahle

kis musībat meñ hai gulzār chalo dekheñge

ham ko kal tak to rulāyā hai burī ḳhabroñ ne

aaj kyā kahtā hai aḳhbār chalo dekheñge

vaqt aane vo sabhī log bichhaḌ jā.eñge

kaun hotā hai vafādār chalo dekheñge

rāste paañv kī zanjīr bane jaate haiñ

manzileñ kitnī haiñ dushvār chalo dekheñge

apne bachchoñ ke liye dhuup meñ jhulse ham bhī

ham se kitnā hai unheñ pyaar chalo dekheñge

apne hāthoñ se tarāshā hai jise 'anjum' ne

apnī āñkhoñ se vo shahkār chalo dekheñge

garm hai ishq ka bazar chalo dekhenge

kaun hai apna KHaridar chalo dekhenge

kaun hai qaum ka sardar chalo dekhenge

wo bhi kis ka hai talabgar chalo dekhenge

sabz baghon ki ziyarat to bahut achchhi hai

kaun hamdard hai sarkar chalo dekhenge

hum ne kaliyon ko jahan KHun diya tha pahle

kis musibat mein hai gulzar chalo dekhenge

hum ko kal tak to rulaya hai buri KHabron ne

aaj kya kahta hai aKHbar chalo dekhenge

waqt aane wo sabhi log bichhaD jaenge

kaun hota hai wafadar chalo dekhenge

raste panw ki zanjir bane jate hain

manzilen kitni hain dushwar chalo dekhenge

apne bachchon ke liye dhup mein jhulse hum bhi

hum se kitna hai unhen pyar chalo dekhenge

apne hathon se tarasha hai jise 'anjum' ne

apni aankhon se wo shahkar chalo dekhenge