garm har lamha lahu jism ke andar rakhna

garm har lamha lahū jism ke andar rakhnā

ḳhushk āñkheñ hoñ magar dil meñ samundar rakhnā

baat niklegī jūñhī ghar se parā.ī hogī

paañv kuchh soch ke dahlīz se bāhar rakhnā

zulmat-e-shab meñ kahīñ ḳhud hī na Thokar khaa.e

dushman-e-jāñ ke bhī raste meñ na patthar rakhnā

zar, zamīñ, zor kā saudā jo samā.e sar meñ

rū-ba-rū naqsha-e-anjām-e-sikandar rakhnā

chaḌhte sūraj kī chamak apnī jagah hai lekin

guzrī rātoñ ke bhī kuchh zehn meñ manzar rakhnā

kuchh na pā.egā anā bech ke darbāroñ se

kaisī hī bhiiḌ bane takiya ḳhudā par rakhnā

is bulandī kā safar sahl nahīñ hai 'rāsiḳh'

har qadam rāh-e-mohabbat pe sambhal kar rakhnā

garm har lamha lahu jism ke andar rakhna

KHushk aankhen hon magar dil mein samundar rakhna

baat niklegi junhi ghar se parai hogi

panw kuchh soch ke dahliz se bahar rakhna

zulmat-e-shab mein kahin KHud hi na Thokar khae

dushman-e-jaan ke bhi raste mein na patthar rakhna

zar, zamin, zor ka sauda jo samae sar mein

ru-ba-ru naqsha-e-anjam-e-sikandar rakhna

chaDhte suraj ki chamak apni jagah hai lekin

guzri raaton ke bhi kuchh zehn mein manzar rakhna

kuchh na paega ana bech ke darbaron se

kaisi hi bhiD bane takiya KHuda par rakhna

is bulandi ka safar sahl nahin hai 'rasiKH'

har qadam rah-e-mohabbat pe sambhal kar rakhna