garmi-e-shauq-e-nazara ka asar to dekho

garmī-e-shauq-e-nazārā kā asar to dekho

gul khile jaate haiñ vo sāya-e-tar to dekho

aise nādāñ bhī na the jaañ se guzarne vaale

nāseho pand-garo rāhguzar to dekho

vo to vo hai tumheñ ho jā.egī ulfat mujh se

ik nazar tum mirā mahbūb-e-nazar to dekho

vo jo ab chaak garebāñ bhī nahīñ karte haiñ

dekhne vaalo kabhī un kā jigar to dekho

dāman-e-dard ko gulzār banā rakkhā hai

aao ik din dil-e-pur-ḳhūñ kā hunar to dekho

sub.h kī tarah jhamaktā hai shab-e-ġham kā ufuq

'faiz' tābindagī-e-dīda-e-tar to dekho

garmi-e-shauq-e-nazara ka asar to dekho

gul khile jate hain wo saya-e-tar to dekho

aise nadan bhi na the jaan se guzarne wale

naseho pand-garo rahguzar to dekho

wo to wo hai tumhein ho jaegi ulfat mujh se

ek nazar tum mera mahbub-e-nazar to dekho

wo jo ab chaak gareban bhi nahin karte hain

dekhne walo kabhi un ka jigar to dekho

daman-e-dard ko gulzar bana rakkha hai

aao ek din dil-e-pur-KHun ka hunar to dekho

subh ki tarah jhamakta hai shab-e-gham ka ufuq

'faiz' tabindagi-e-dida-e-tar to dekho