garmi mere kyun na ho suKHan mein

garmī mire kyuuñ na ho suḳhan meñ

ik aag sī phuñk rahī hai tan meñ

vo rashk-e-gul aa.e gar pas-az-marg

phūlā na samā.ūñ maiñ kafan meñ

hushyārī meñ kab hai aisī lazzat

jo kuchh hai mazā divāna-pan meñ

ḳhvārī kā mirī vo lutf samjhe

kāmil ho jo āshiqī ke fan meñ

gardish jinheñ misl-e-āsiyā hai

daa.im unheñ hai safar vatan meñ

nāseh maiñ rafū ko tab kahūñ aah

hālat ho jo kuchh bhī pairahan meñ

ai bād-e-ḳhizāñ vo kyā hue gul

ḳhaak uḌne lagī hai kyuuñ chaman meñ

betābi-e-dil kare hai rusvā

kyā jā.iye us kī anjuman meñ

hai tirā hī dhyān aur kuchh ab

baaqī nahīñ tere ḳhasta-tan meñ

jald us ko dikhā de shakl ai jaañ

rah jā.egī varna man kī man meñ

ghar meñ jo nahīñ vo yaar 'jur.at'

ghabrā.e hai apnī jaan tan meñ

hai jī meñ ki ḳhāna kar ke vīrāñ

jā baiThiye ik ujaaḌ ban meñ

garmi mere kyun na ho suKHan mein

ek aag si phunk rahi hai tan mein

wo rashk-e-gul aae gar pas-az-marg

phula na samaun main kafan mein

hushyari mein kab hai aisi lazzat

jo kuchh hai maza diwana-pan mein

KHwari ka meri wo lutf samjhe

kaamil ho jo aashiqi ke fan mein

gardish jinhen misl-e-asiya hai

daim unhen hai safar watan mein

naseh main rafu ko tab kahun aah

haalat ho jo kuchh bhi pairahan mein

ai baad-e-KHizan wo kya hue gul

KHak uDne lagi hai kyun chaman mein

betabi-e-dil kare hai ruswa

kya jaiye us ki anjuman mein

hai tera hi dhyan aur kuchh ab

baqi nahin tere KHasta-tan mein

jald us ko dikha de shakl ai jaan

rah jaegi warna man ki man mein

ghar mein jo nahin wo yar 'jurat'

ghabrae hai apni jaan tan mein

hai ji mein ki KHana kar ke viran

ja baiThiye ek ujaD ban mein