ghaur karo to chehra chehra oDhe gahre gahre rang

ġhaur karo to chehra chehra oḌhe gahre gahre rañg

jag-album meñ bhare paḌe haiñ andhe gūñge bahre rañg

kal shab is dhartī par maiñ thā yā phir chāñd sitāre the

ik manzar thā tanhā maiñ aur chāroñ or sunahre rañg

terī yaad bhī dhul jā.egī is mausam kī bārish meñ

barkhā-rut meñ dīvāroñ par āḳhir kab tak Thahre rañg

vahshī kirneñ phuul badan se mahak churāne aatī haiñ

jab tak phuul ke dam meñ dam hai tanhā degā pahre rañg

puurā chāñd aur harā samundar lahroñ kā vo raqs huā

mauj mauj nashshe meñ 'rāshid' lahr lahr meñ lahre rañg

ghaur karo to chehra chehra oDhe gahre gahre rang

jag-album mein bhare paDe hain andhe gunge bahre rang

kal shab is dharti par main tha ya phir chand sitare the

ek manzar tha tanha main aur chaaron or sunahre rang

teri yaad bhi dhul jaegi is mausam ki barish mein

barkha-rut mein diwaron par aaKHir kab tak Thahre rang

wahshi kirnen phul badan se mahak churane aati hain

jab tak phul ke dam mein dam hai tanha dega pahre rang

pura chand aur hara samundar lahron ka wo raqs hua

mauj mauj nashshe mein 'rashid' lahr lahr mein lahre rang