gaurayyon ne jashn manaya mere aangan barish ka

gaurayyoñ ne jashn manāyā mere āñgan bārish kā

baiThe baiThe aa ga.ī niiñd isrār thā ye kisī ḳhvāhish kā

chand kitābeñ thoḌe sapne ik kamre meñ rahte haiñ

maiñ bhī yahāñ gunjā.ish bhar huuñ kis ko ḳhayāl ārā.ish kā

Thahar Thahar kar kauñd rahī thī bijlī bāhar jañgal meñ

train rukī to sarpaT ho gayā ghoḌā vaqt kī tāzish kā

Tiis purāne zaḳhmoñ kī thī niiñd uchaT ga.ī āñkhoñ se

bhiig rahā thā karvaT karvaT gosha gosha bālish kā

kisī ke dil par dastak dūñgā kisī ke ġham kā dukhḌā huuñ

sunñe vaale samajh rahe haiñ naġhma huuñ farmā.ish kā

sar ke uupar ḳhaak uḌī to sab dil thaam ke baiTh ga.e

ḳhabar nahīñ thī guzar chukā hai mausam abr-e-navāzish kā

reñg rahī thiiñ amar-latā.eñ chhup chhup kar shādābī meñ

uryāñ hotī shāḳhoñ se ab bharam khulā zebā.ish kā

apnī hī dhun meñ magan rahtā hai sachche sur kā sāzinda

jaise ki maiñ huuñ matvālā ḳhud apne tarz-e-nigārish kā

qadam qadam hai vīrāna kahīñ aur 'ḳhalish' ab kyā jaanā

varna shauq mujhe bhī kal thā sahrā kī paimā.ish kā

gaurayyon ne jashn manaya mere aangan barish ka

baiThe baiThe aa gai nind israr tha ye kisi KHwahish ka

chand kitaben thoDe sapne ek kamre mein rahte hain

main bhi yahan gunjaish bhar hun kis ko KHayal aaraish ka

Thahar Thahar kar kaund rahi thi bijli bahar jangal mein

train ruki to sarpaT ho gaya ghoDa waqt ki tazish ka

Tis purane zaKHmon ki thi nind uchaT gai aankhon se

bhig raha tha karwaT karwaT gosha gosha baalish ka

kisi ke dil par dastak dunga kisi ke gham ka dukhDa hun

sunne wale samajh rahe hain naghma hun farmaish ka

sar ke upar KHak uDi to sab dil tham ke baiTh gae

KHabar nahin thi guzar chuka hai mausam abr-e-nawazish ka

reng rahi thin amar-lataen chhup chhup kar shadabi mein

uryan hoti shaKHon se ab bharam khula zebaish ka

apni hi dhun mein magan rahta hai sachche sur ka sazinda

jaise ki main hun matwala KHud apne tarz-e-nigarish ka

qadam qadam hai virana kahin aur 'KHalish' ab kya jaana

warna shauq mujhe bhi kal tha sahra ki paimaish ka