گواہی دینے لگا تھا مرے خلاف بدن

گواہی دینے لگا تھا مرے خلاف بدن

نشے میں چھو نہ سکا میں وہ پاک صاف بدن

تم اس کا ذکر کرو تو زباں سدھر جائے

وہ لکھنؤ کا تلفظ وہ شین قاف بدن

میں سن رہا تھا خود اپنے ضمیر کی آواز

ہزار کرتا ضرورت کا انکشاف بدن

وہ سرد رات رگوں میں لہو جما دیتی

اگر میں اوڑھ نہ لیتا کوئی لحاف بدن

وہ میری جلد کی صورت مڑھا ہوا مجھ پر

کسا کسا وہ مرے جسم پر غلاف بدن

مرے گناہ پہ ناراض تو رہا کچھ دن

مگر ضمیر نے پھر کر دیا معاف بدن