gaya hai jab se dikha jalwa wo pari-ruKHsar

gayā hai jab se dikhā jalva vo parī-ruḳhsār

na ḳhvāb dīda-e-giryāñ meñ hai na dil ko qarār

hazār rañg se phūle chaman meñ go gulzār

par us baġhair ḳhush aatī nahīñ mujhe ye bahār

ba-rañg-e-lāla-e-sar mai-kashī nahīñ tujh bin

ki ḳhūn-e-dil se maiñ har roz toḌtā huuñ ḳhumār

guloñ ke muñh pe na ye rañg-e-āb-o-tāb rahe

vo rashk-e-bāġh kare gar udhar ko aa ke guzār

ajab nahiñ ki bahā deve ḳhāna-e-mardum

rahe gar ashk-fishāñ yūñhī dīda-e-ḳhūñ-bār

rihā.ī kyūñki ho yā-rab maiñ is meñ hairāñ huuñ

ki ek dil hai mirā tis pe dard-o-ġham hai hazār

kahā maiñ us but-e-abrū-kamāñ kī ḳhidmat meñ

ḳhadañg-e-jabr ne tere kiyā hai mujh ko nigār

na rahm tere dil-e-saḳht meñ hai ġhair-az-zulm

na mere nāla-e-jāñ-soz meñ asar ai yaar

na taab hijr kī rakhtā huuñ ne umīd-e-visāl

ḳhudā hī jaane ki kyā hogā us kā āḳhir-kār

har ek din mujhe yuuñ sūjhtā hai jī tan se

nikal hī jā.egā ham-rāh-e-āh-e-ātish-bār

na tū mazār pe āvegā tā-dam-e-mahshar

rahegī dīda-e-giryāñ ko hasrat-e-dīdār

abas tū mujh ko Darātā hai apne marne se

hazār tujh se mire mar ga.e haiñ āshiq-e-zār

ye sun ke kahne lagā vo sitamgar-e-be-rahm

mirī balā se jo mar jā.egā tū ai 'bedār'

gaya hai jab se dikha jalwa wo pari-ruKHsar

na KHwab dida-e-giryan mein hai na dil ko qarar

hazar rang se phule chaman mein go gulzar

par us baghair KHush aati nahin mujhe ye bahaar

ba-rang-e-lala-e-sar mai-kashi nahin tujh bin

ki KHun-e-dil se main har roz toDta hun KHumar

gulon ke munh pe na ye rang-e-ab-o-tab rahe

wo rashk-e-bagh kare gar udhar ko aa ke guzar

ajab nahin ki baha dewe KHana-e-mardum

rahe gar ashk-fishan yunhi dida-e-KHun-bar

rihai kyunki ho ya-rab main is mein hairan hun

ki ek dil hai mera tis pe dard-o-gham hai hazar

kaha main us but-e-abru-kaman ki KHidmat mein

KHadang-e-jabr ne tere kiya hai mujh ko nigar

na rahm tere dil-e-saKHt mein hai ghair-az-zulm

na mere nala-e-jaan-soz mein asar ai yar

na tab hijr ki rakhta hun ne umid-e-visal

KHuda hi jaane ki kya hoga us ka aaKHir-kar

har ek din mujhe yun sujhta hai ji tan se

nikal hi jaega ham-rah-e-ah-e-atish-bar

na tu mazar pe aawega ta-dam-e-mahshar

rahegi dida-e-giryan ko hasrat-e-didar

abas tu mujh ko Daraata hai apne marne se

hazar tujh se mere mar gae hain aashiq-e-zar

ye sun ke kahne laga wo sitamgar-e-be-rahm

meri bala se jo mar jaega tu ai 'bedar'