gaya jab bhi to sar-ta-pa gaya main

gayā jab bhī to sar-tā-pā gayā maiñ

jahāñ aksar nahīñ aaya gayā maiñ

havā aa jā.egī dar band kar lo

diye kī chīḳh se ghabrā gayā maiñ

jamegī kaa.ī ik muddat meñ us par

yahī kuchh soch kar rakkhā gayā maiñ

ta.āruf raushnī kā ho gayā jab

to is ke baad bulvāyā gayā maiñ

har ik rasta tire ghar kā thā rasta

ye sab kuchh dekh kar uktā gayā maiñ

dalā.el aql istidlāl ījād

magar ik ishq se Takrā gayā maiñ

jo apnī aql par nāzāñ bahut thā

use dil tak to le kar aa gayā maiñ

ibādat phir duā aur phir ibādat

ḳhudā se kis qadar māñgā gayā maiñ

vahāñ ik sabr thā be-intihā sabr

yahāñ ik dil jise taḌpā gayā maiñ

yahāñ āvāz thī hairat vahāñ thī

so ghar se chal paḌā chaltā gayā maiñ

gaya jab bhi to sar-ta-pa gaya main

jahan aksar nahin aaya gaya main

hawa aa jaegi dar band kar lo

diye ki chiKH se ghabra gaya main

jamegi kai ek muddat mein us par

yahi kuchh soch kar rakkha gaya main

taaruf raushni ka ho gaya jab

to is ke baad bulwaya gaya main

har ek rasta tere ghar ka tha rasta

ye sab kuchh dekh kar ukta gaya main

dalael aql istidlal ijad

magar ek ishq se Takra gaya main

jo apni aql par nazan bahut tha

use dil tak to le kar aa gaya main

ibaadat phir dua aur phir ibaadat

KHuda se kis qadar manga gaya main

wahan ek sabr tha be-intiha sabr

yahan ek dil jise taDpa gaya main

yahan aawaz thi hairat wahan thi

so ghar se chal paDa chalta gaya main