gaya ki sail-e-rawan ka bahaw aisa tha

gayā ki sail-e-ravāñ kā bahāv aisā thā

vo ek ḳhvāb jo kāġhaz kī naav aisā thā

kisī ko bhī na thā āsān saañs kā lenā

mirī zamīñ pe havā kā dabāv aisā thā

lahū kī dhaar salāmat rahī na saañs kā taar

mujhe jo kaaT gayā vo kaTāv aisā thā

vo TimTimātā to us kī ziyā bhī kam paḌtī

kisī diye se lahū kā lagāv aisā thā

vo ek thā jo mujhe chār-sū dikhā.ī diyā

maiñ jañg haar gayā huuñ ki daav aisā thā

mujhe to laaj ke ujle libās meñ vo badan

gulāb barf meñ jaise chhupāo aisā thā

bane haiñ naag mire ban meñ peḌ jitne the

lagī hai aag sabā kā subhāv aisā thā

gaya ki sail-e-rawan ka bahaw aisa tha

wo ek KHwab jo kaghaz ki naw aisa tha

kisi ko bhi na tha aasan sans ka lena

meri zamin pe hawa ka dabaw aisa tha

lahu ki dhaar salamat rahi na sans ka tar

mujhe jo kaT gaya wo kaTaw aisa tha

wo TimTimata to us ki ziya bhi kam paDti

kisi diye se lahu ka lagaw aisa tha

wo ek tha jo mujhe chaar-su dikhai diya

main jang haar gaya hun ki daw aisa tha

mujhe to laj ke ujle libas mein wo badan

gulab barf mein jaise chhupao aisa tha

bane hain nag mere ban mein peD jitne the

lagi hai aag saba ka subhaw aisa tha