gaya sab andoh apne dil ka thame ab aansu qarar aaya

gayā sab andoh apne dil kā thame ab aañsū qarār aayā

nasīb jaage sitāra chamkā phire din apne vo yaar aayā

kaho ye saaqī se aa ḳhudārā kare na kashtī-e-mai kinārā

ḳhudā kī rahmat ne josh maarā barastā abr-e-bahār aayā

uThā.ī kyā kyā na maiñ ne zahmat magar na kī tark us kī ulfat

rahā hamesha maiñ saaf tīnat kabhī na dil par ġhubār aayā

huā hai kyā tuur sho.ala-afshāñ bhaḌak uThī ātish-gulistāñ

jalā.e detā hai dāġh-e-hijrāñ kahāñ se uḌ kar sharār aayā

ḳhudā nibāhe ye āshnā.ī hameñ ye ulfat ke laag bhaa.ī

kisī din us par jo dhuup aa.ī yahāñ qalaq se buḳhār aayā

kaTe taḌapne meñ zindagānī na lī kisī ne ḳhabar hamārī

ye haal pūchhā ki arsh tak bhī hamārā naala pukār aayā

khaTak hai āñkhoñ meñ merī ab tak dil us kā bhī ho rahā hai dhak-dhak

na diid mujh ko huī mubārak na raas us ko siñgār aayā

kamand-e-zulf-e-rasā se baare bache to mizhgāñ ne tiir maare

ġhazab hai pesh-e-nazar tumhāre jo koī aayā shikār aayā

bichhāyā kamre meñ farsh jhaT-paT durust kī sej kī sajāvaT

sunī jo maiñ ne kisī ke aahaT gumān guzrā ki yaar aayā

kabhī jo baaje kī lahr aa.e havās uḌaa.e vo shab bajā.e

fusūñ ke boloñ pe gat banā.e chhalāvā ban kar sitār aayā

chale jo āshiq pe tīr-o-ḳhanzar huā vo sarsabz surḳh ho kar

chaḌhā sar us kā agar sināñ par nihāl-e-ulfat meñ yaar aayā

use samajhte haiñ jo haiñ ġhāzī ki sar kaTānā hai sarfarāzī

karegā kyā koī ishq-bāzī meñ jaan bad ke bidhār aayā

huī ye barbād zindagānī rahī na hastī kī kuchh nishānī

sabā ne har chand ḳhaak chhānī na haath musht-e-ġhubār aayā

ye chāhne vaale chāhte the gale kā haar apnā kar ke rakhiye

diye na kis kis ne us ko dhāge na dam meñ vo gul-ezār aayā

visāl-e-mahbūb kī tamannā kisī par iz.hār kī na aslan

qirān-e-sa.adain maiñ ne pūchhā jo koī aḳhtar-shumār aayā

chahak rahe haiñ chaman meñ bulbul mahak rahe haiñ khule hue kul

chhalak rahe haiñ piyāla-e-mul ḳhushī hai abr-e-bahār aayā

batāo ai 'bahr' apnī jab kī kisī se tum ne bhī dil-lagī kī

ḳhush aa.ī sūrat kisī parī kī kisī pe tum ko bhī pyaar aayā

gaya sab andoh apne dil ka thame ab aansu qarar aaya

nasib jage sitara chamka phire din apne wo yar aaya

kaho ye saqi se aa KHudara kare na kashti-e-mai kinara

KHuda ki rahmat ne josh mara barasta abr-e-bahaar aaya

uThai kya kya na main ne zahmat magar na ki tark us ki ulfat

raha hamesha main saf tinat kabhi na dil par ghubar aaya

hua hai kya tur shoala-afshan bhaDak uThi aatish-gulistan

jalae deta hai dagh-e-hijran kahan se uD kar sharar aaya

KHuda nibahe ye aashnai hamein ye ulfat ke lag bhai

kisi din us par jo dhup aai yahan qalaq se buKHar aaya

kaTe taDapne mein zindagani na li kisi ne KHabar hamari

ye haal puchha ki arsh tak bhi hamara nala pukar aaya

khaTak hai aankhon mein meri ab tak dil us ka bhi ho raha hai dhak-dhak

na did mujh ko hui mubarak na ras us ko singar aaya

kamand-e-zulf-e-rasa se bare bache to mizhgan ne tir mare

ghazab hai pesh-e-nazar tumhaare jo koi aaya shikar aaya

bichhaya kamre mein farsh jhaT-paT durust ki sej ki sajawaT

suni jo main ne kisi ke aahaT guman guzra ki yar aaya

kabhi jo baje ki lahr aae hawas uDae wo shab bajae

fusun ke bolon pe gat banae chhalawa ban kar sitar aaya

chale jo aashiq pe tir-o-KHanzar hua wo sarsabz surKH ho kar

chaDha sar us ka agar sinan par nihaal-e-ulfat mein yar aaya

use samajhte hain jo hain ghazi ki sar kaTana hai sarfaraazi

karega kya koi ishq-bazi mein jaan bad ke bidhaar aaya

hui ye barbaad zindagani rahi na hasti ki kuchh nishani

saba ne har chand KHak chhani na hath musht-e-ghubar aaya

ye chahne wale chahte the gale ka haar apna kar ke rakhiye

diye na kis kis ne us ko dhage na dam mein wo gul-ezar aaya

visal-e-mahbub ki tamanna kisi par izhaar ki na aslan

qiran-e-sadain main ne puchha jo koi aKHtar-shumar aaya

chahak rahe hain chaman mein bulbul mahak rahe hain khule hue kul

chhalak rahe hain piyala-e-mul KHushi hai abr-e-bahaar aaya

batao ai 'bahr' apni jab ki kisi se tum ne bhi dil-lagi ki

KHush aai surat kisi pari ki kisi pe tum ko bhi pyar aaya