gaya wo daur to KHwabon ke silsile bhi gae

gayā vo daur to ḳhvāboñ ke silsile bhī ga.e

dil-o-nigāh ke pur-kaif hausle bhī ga.e

vahī ga.e to phir ab shikva-o-shikāyat kyā

shikāyateñ ga.iiñ shikve ga.e gile bhī ga.e

bikhar ke rah ga.ī tasvīr ārzūoñ kī

ummīd-o-ās-o-tamannā ke qāfile bhī ga.e

yahī nahīñ ki bahut sī latāfateñ rūThīñ

adā-o-nāz ke rañgīn marhale bhī ga.e

bujhe bujhe se haiñ āshāoñ ke kañval qādir

ḳharosh-e-zīst gayā dil ke valvale bhī ga.e

gaya wo daur to KHwabon ke silsile bhi gae

dil-o-nigah ke pur-kaif hausle bhi gae

wahi gae to phir ab shikwa-o-shikayat kya

shikayaten gain shikwe gae gile bhi gae

bikhar ke rah gai taswir aarzuon ki

ummid-o-as-o-tamanna ke qafile bhi gae

yahi nahin ki bahut si latafaten ruThin

ada-o-naz ke rangin marhale bhi gae

bujhe bujhe se hain aashaon ke kanwal qadir

KHarosh-e-zist gaya dil ke walwale bhi gae