ghazab ki kaT thi ab ke hawa ke tanon mein

ġhazab kī kaaT thī ab ke havā ke tānoñ meñ

shigāf paḌ ga.e haiñ be-zabāñ chaTānoñ meñ

hamāre hoñT hī patthar ke haiñ vagarna miyāñ

ham ek aag liye phirte haiñ dahānoñ meñ

bagūla ban ke uThā to maiñ thā ḳharābe se

bapā huā na koī hashr āsmānoñ meñ

siyāh shahr kī qismat meñ merā faiz kahāñ

charāġh-e-nazr huuñ jaltā huuñ āstānoñ meñ

Tapak paḌā huuñ bil-āḳhir maiñ apnī āñkhoñ se

chhupā rakhā thā mujhe tum ne kin ḳhazānoñ meñ

sukūt ko na kabhī kar sadā se ālūda

ki ye zabāñ hai muqaddas-tarīñ zabānoñ meñ

suḳhan-shanās fasīloñ kā hai sukūt ġhazab

suḳhan-tarāz haiñ zanjīreñ qaid-ḳhānoñ meñ

ghazab ki kaT thi ab ke hawa ke tanon mein

shigaf paD gae hain be-zaban chaTanon mein

hamare honT hi patthar ke hain wagarna miyan

hum ek aag liye phirte hain dahanon mein

bagula ban ke uTha to main tha KHarabe se

bapa hua na koi hashr aasmanon mein

siyah shahr ki qismat mein mera faiz kahan

charagh-e-nazr hun jalta hun aastanon mein

Tapak paDa hun bil-aKHir main apni aankhon se

chhupa rakha tha mujhe tum ne kin KHazanon mein

sukut ko na kabhi kar sada se aaluda

ki ye zaban hai muqaddas-tarin zabanon mein

suKHan-shanas fasilon ka hai sukut ghazab

suKHan-taraaz hain zanjiren qaid-KHanon mein