ghazal kahne ka kis ko Dhab raha hai

ġhazal kahne kā kis ko Dhab rahā hai

vo rutba ishq kā ab kab rahā hai

bashāshat barg-e-gul meñ hai jo itnī

kisī ke lab par us kā lab rahā hai

mushavvash shakl se us gul kī zāhir

ye hotā hai kahīñ vo shab rahā hai

parastish hī meñ shab āḳhir huī hai

hamāre paas vo but jab rahā hai

tumhāre ahd meñ ai kāfiro haa.e

kahāñ vo millat o maz.hab rahā hai

mirā zaanū tire zaanū ke nīche

uThūñ kyūñ-kar ki kāfir dab rahā hai

ise kab nāz-e-bustāñ kī havas hai

ye dil nit kushta-e-ġhabġhab rahā hai

mū-e-juz 'mīr' jo the fan ke ustād

yahī ik reḳhta-go ab rahā hai

nit us kī 'mus.hafī' khātā huuñ dushnām

yahī to merā ab mansab rahā hai

ghazal kahne ka kis ko Dhab raha hai

wo rutba ishq ka ab kab raha hai

bashashat barg-e-gul mein hai jo itni

kisi ke lab par us ka lab raha hai

mushawwash shakl se us gul ki zahir

ye hota hai kahin wo shab raha hai

parastish hi mein shab aaKHir hui hai

hamare pas wo but jab raha hai

tumhaare ahd mein ai kafiro hae

kahan wo millat o mazhab raha hai

mera zanu tere zanu ke niche

uThun kyun-kar ki kafir dab raha hai

ise kab naz-e-bustan ki hawas hai

ye dil nit kushta-e-ghabghab raha hai

mu-e-juz 'mir' jo the fan ke ustad

yahi ek reKHta-go ab raha hai

nit us ki 'mushafi' khata hun dushnam

yahi to mera ab mansab raha hai