ghazal kahti nahin hai bas lab-o-ruKHsar ki baaten

ġhazal kahtī nahīñ hai bas lab-o-ruḳhsār kī bāteñ

bayāñ kartī hai vo ishq-o-vafā aur pyaar kī bāteñ

takallum kī nahīñ muhtāj aur na lab-kushā.ī kī

ishāroñ meñ bayāñ kartī hai hāl-e-zār kī bāteñ

kahīñ kashtī ke hachkole kahīñ ummīd sāhil kī

kabhī maujoñ ke naġhme haiñ kabhī mañjdhār kī bāteñ

latāfat is meñ phūloñ kī to kāñToñ kī chubhan bhī hai

kahīñ ghuñgrū kī āvāzeñ kahīñ talvār kī bāteñ

ye haq kī tarjumāñ munsif rafīq-e-rāzdāñ sab kuchh

junūñ kī anjuman meñ phir dil-e-bedār kī bāteñ

isī meñ jām-e-jam jām-o-subū sāqī-o-mai-ḳhāna

ye aabid kā amal aur hasrat-e-mai-ḳhvār kī bāteñ

qalam kī nok par 'tābish' ka.ī jazbe machalte haiñ

varaq ko rāzdāñ kar leñ kareñ asrār kī bāteñ

ghazal kahti nahin hai bas lab-o-ruKHsar ki baaten

bayan karti hai wo ishq-o-wafa aur pyar ki baaten

takallum ki nahin muhtaj aur na lab-kushai ki

ishaaron mein bayan karti hai haal-e-zar ki baaten

kahin kashti ke hachkole kahin ummid sahil ki

kabhi maujon ke naghme hain kabhi manjdhaar ki baaten

latafat is mein phulon ki to kanTon ki chubhan bhi hai

kahin ghungru ki aawazen kahin talwar ki baaten

ye haq ki tarjuman munsif rafiq-e-raazdan sab kuchh

junun ki anjuman mein phir dil-e-bedar ki baaten

isi mein jam-e-jam jam-o-subu saqi-o-mai-KHana

ye aabid ka amal aur hasrat-e-mai-KHwar ki baaten

qalam ki nok par 'tabish' kai jazbe machalte hain

waraq ko raazdan kar len karen asrar ki baaten