غزل کے پیڑ کو برگ نوا نہیں دیتے

غزل کے پیڑ کو برگ نوا نہیں دیتے

یہ کیوں مجھے مرے موسم کھلا نہیں دیتے

یہ چلچلاتی ہوئی چپ مجھے جلا دے گی

تم ایک لفظ کو سایہ بنا نہیں دیتے

میں زندگی کی گھٹن کا علاج چاہتا ہوں

مجھے اداس دریچے ہوا نہیں دیتے

ہماری آنکھ کا اسٹیج ہو گیا خالی

تم اپنے خواب کا منظر دکھا نہیں دیتے

کہاں گئے مرے ساماں میں چند زخم بھی تھے

مجھے بھی تم مرا اندوختہ نہیں دیتے

میں ان کو روند کے آگے نکلنے والا تھا

اگر یہ لوگ مجھے راستہ نہیں دیتے

نئے محاذ پہ کیسے ڈٹے رہیں یاورؔ

ہمارے زخم ہمیں حوصلہ نہیں دیتے