ghazal ke peD ko barg-e-nawa nahin dete

ġhazal ke peḌ ko barg-e-navā nahīñ dete

ye kyoñ mujhe mire mausam khilā nahīñ dete

ye chilchilātī huī chup mujhe jalā degī

tum ek lafz ko saaya banā nahīñ dete

maiñ zindagī kī ghuTan kā 'ilāj chāhtā huuñ

mujhe udaas darīche havā nahīñ dete

hamārī aañkh kā stage ho gayā ḳhālī

tum apne ḳhvāb kā manzar dikhā nahīñ dete

kahāñ ga.e mire sāmāñ meñ chand zaḳhm bhī the

mujhe bhī tum mirā andoḳhta nahīñ dete

maiñ in ko rauñd ke aage nikalne vaalā thā

agar ye log mujhe rāsta nahīñ dete

na.e mahāz pe kaise DaTe raheñ 'yāvar'

hamāre zaḳhm hameñ hausla nahīñ dete

ghazal ke peD ko barg-e-nawa nahin dete

ye kyon mujhe mere mausam khila nahin dete

ye chilchilati hui chup mujhe jala degi

tum ek lafz ko saya bana nahin dete

main zindagi ki ghuTan ka 'ilaj chahta hun

mujhe udas dariche hawa nahin dete

hamari aankh ka stage ho gaya KHali

tum apne KHwab ka manzar dikha nahin dete

kahan gae mere saman mein chand zaKHm bhi the

mujhe bhi tum mera andoKHta nahin dete

main in ko raund ke aage nikalne wala tha

agar ye log mujhe rasta nahin dete

nae mahaz pe kaise DaTe rahen 'yawar'

hamare zaKHm hamein hausla nahin dete