ghazal ki aag qalam ki ghuTan barae-faroKHt

ġhazal kī aag qalam kī ghuTan barā.e-faroḳht

ye kaun rakh gayā zehnī thakan barā.e-faroḳht

kitābeñ pheñk ke ġhurbat ne apne hāthoñ se

ye likh liyā hai badan par badan barā.e-faroḳht

bañdhe hue haiñ kisī rabt-e-ġhaib se donoñ

badan barā.e-kafan hai kafan barā.e-faroḳht

uThā ke rakh diye bāzār kī panāhoñ meñ

suḳhan-farosh ne sher-o-suḳhan barā.e-faroḳht

zarūratoñ ne javāñ laḌkiyoñ ke māthe par

ye god rakkhā hai raḳht-e-badan barā.e-faroḳht

ye kis ne rakh diye majbūriyoñ kī manDī meñ

kahīñ pe jism kahīñ pairahan barā.e-faroḳht

ghazal ki aag qalam ki ghuTan barae-faroKHt

ye kaun rakh gaya zehni thakan barae-faroKHt

kitaben phenk ke ghurbat ne apne hathon se

ye likh liya hai badan par badan barae-faroKHt

bandhe hue hain kisi rabt-e-ghaib se donon

badan barae-kafan hai kafan barae-faroKHt

uTha ke rakh diye bazar ki panahon mein

suKHan-farosh ne sher-o-suKHan barae-faroKHt

zaruraton ne jawan laDkiyon ke mathe par

ye god rakkha hai raKHt-e-badan barae-faroKHt

ye kis ne rakh diye majburiyon ki manDi mein

kahin pe jism kahin pairahan barae-faroKHt