ghazal mein husn ka uske bayan rakhna hai

ġhazal meñ husn kā us ke bayān rakhnā hai

kamāl āñkhoñ meñ goyā zabān rakhnā hai

jahāz-rāñ hunar o hausla na le jā saath

huā ke ruḳh pe agar bādbān rakhnā hai

bharā to hai mirā tarkash magar ye dil hai gudāz

so 'umr bhar mujhe ḳhālī kamān rakhnā hai

diye bujhātī rahī dil bujhā sake to bujhā.e

havā ke sāmne ye imtihān rakhnā hai

bahut hañse mire is faisle pe sāya-nashīñ

ki sar pe dhuup ko ab sā.ebān rakhnā hai

ho intizār-e-bahārāñ jahāñ na ranj-e-ḳhizāñ

'kamāl' aisā bayābāñ makān rakhnā hai

ghazal mein husn ka us ke bayan rakhna hai

kamal aankhon mein goya zaban rakhna hai

jahaz-ran hunar o hausla na le ja sath

hua ke ruKH pe agar baadban rakhna hai

bhara to hai mera tarkash magar ye dil hai gudaz

so 'umr bhar mujhe KHali kaman rakhna hai

diye bujhati rahi dil bujha sake to bujhae

hawa ke samne ye imtihan rakhna hai

bahut hanse mere is faisle pe saya-nashin

ki sar pe dhup ko ab saeban rakhna hai

ho intizar-e-bahaaran jahan na ranj-e-KHizan

'kamal' aisa bayaban makan rakhna hai