ghazlen bhi bahut likkhin aur git bahut gae

ġhazleñ bhī bahut likkhīñ aur giit bahut gaa.e

ham sher kī azmat ko lekin na pahuñch paa.e

kuchh aisā anokhā bhī andāz na thā apnā

kuchh log magar phir bhī ham ko na samajh paa.e

ham dil kī amīrī se is darja tavangar the

jo ḳhaak milī ham ko ham sonā banā laa.e

miTTī mere khetoñ kī hathiyā lī asīroñ ne

aur jitne gharauñde the yāroñ ne mire Dhaa.e

rahzan se bachā laa.e sab māl-o-matā' apnī

ghar luuT ga.e lekin jo the mire hamsā.e

ham ahl-e-hunar ab to is haal pe qaane haiñ

nai dhuup hai aariz kī nai gesuoñ ke saa.e

vo ahd-e-javānī jo is shahr meñ kaaTā thā

ai kaash kabhī vo bhī ik roz palaT aa.e

ye aag mire ghar meñ hai apne charāġhoñ kī

dushman ko zarūrat kyā chingārī vo bhaḌkā.e

dushman kā nasīb ab to ye apnī karāmat hai

dahlīz pe us kī ham ne.amat ye luTā aa.e

ghazlen bhi bahut likkhin aur git bahut gae

hum sher ki azmat ko lekin na pahunch pae

kuchh aisa anokha bhi andaz na tha apna

kuchh log magar phir bhi hum ko na samajh pae

hum dil ki amiri se is darja tawangar the

jo KHak mili hum ko hum sona bana lae

miTTi mere kheton ki hathiya li asiron ne

aur jitne gharaunde the yaron ne mere Dhae

rahzan se bacha lae sab mal-o-mata' apni

ghar luT gae lekin jo the mere hamsae

hum ahl-e-hunar ab to is haal pe qane hain

nai dhup hai aariz ki nai gesuon ke sae

wo ahd-e-jawani jo is shahr mein kaTa tha

ai kash kabhi wo bhi ek roz palaT aae

ye aag mere ghar mein hai apne charaghon ki

dushman ko zarurat kya chingari wo bhaDkae

dushman ka nasib ab to ye apni karamat hai

dahliz pe us ki hum neamat ye luTa aae