gesu-e-yar ko chehre pe bikharta dekha

gesū-e-yār ko chehre pe bikhartā dekhā

mo.ajiza dekhiye din raat ko yakjā dekhā

yuuñ shab-e-hijr meñ un ko bhī taḌaptā dekhā

bistar-e-marg pe goyā ki masīhā dekhā

ḳhud ko bhī husn kā dīvāna samajh baiThā hai

us parī-chehra kā vaa.iz ne jo shīsha dekhā

kashmakash qatra-e-āñsū kī tirī palkoñ par

ham ne girte hue taare ko laraztā dekhā

phir vahī yād-e-guzishta vahī uljhan vahī ġham

dil ko un bāda-o-sāġhar se bhī bahlā dekhā

gesu-e-yar ko chehre pe bikharta dekha

moajiza dekhiye din raat ko yakja dekha

yun shab-e-hijr mein un ko bhi taDapta dekha

bistar-e-marg pe goya ki masiha dekha

KHud ko bhi husn ka diwana samajh baiTha hai

us pari-chehra ka waiz ne jo shisha dekha

kashmakash qatra-e-ansu ki teri palkon par

hum ne girte hue tare ko larazta dekha

phir wahi yaad-e-guzishta wahi uljhan wahi gham

dil ko un baada-o-saghar se bhi bahla dekha