gesu ko tere ruKH se baham hone na denge

gesū ko tire ruḳh se baham hone na deñge

ham raat ko ḳhurshīd meñ zam hone na deñge

ye dard to ārām-e-do-ālam se sivā hai

ai dost tire dard ko kam hone na deñge

mafhūm badal jā.egā taslīm-o-razā kā

ab ham sar-e-taslīm ko ḳham hone na deñge

sarsar ko sikhā.eñge latāfat kā qarīna

phūloñ pe havāoñ ke sitam hone na deñge

ai kātib-e-taqdīr hamārī bhī razā pūchh

yuuñ nāla-e-taqdīr raqam hone na deñge

jab tak hai dil-e-zār meñ ik qatra-e-ḳhūñ bhī

kam-martaba-e-lauh-e-o-qalam hone na deñge

jo zinda o hassās butoñ kī hai amānat

us sajde ko ham nazr-e-haram hone na deñge

uTh jā.eñge juuñ bād-e-sabā bazm se terī

tujh ko bhī ḳhabar terī qasam hone na deñge

lākhoñ kā sahārā hai yahī jām-e-sifālīñ

sāġhar ko kabhī sāġhar-e-jam hone na deñge

gesu ko tere ruKH se baham hone na denge

hum raat ko KHurshid mein zam hone na denge

ye dard to aaram-e-do-alam se siwa hai

ai dost tere dard ko kam hone na denge

mafhum badal jaega taslim-o-raza ka

ab hum sar-e-taslim ko KHam hone na denge

sarsar ko sikhaenge latafat ka qarina

phulon pe hawaon ke sitam hone na denge

ai katib-e-taqdir hamari bhi raza puchh

yun nala-e-taqdir raqam hone na denge

jab tak hai dil-e-zar mein ek qatra-e-KHun bhi

kam-martaba-e-lauh-e-o-qalam hone na denge

jo zinda o hassas buton ki hai amanat

us sajde ko hum nazr-e-haram hone na denge

uTh jaenge jun baad-e-saba bazm se teri

tujh ko bhi KHabar teri qasam hone na denge

lakhon ka sahaara hai yahi jam-e-sifalin

saghar ko kabhi saghar-e-jam hone na denge